Մայիսի 28-ը Արարատի լուսապսակ ճակատի նման հայ ժողովրդին միավորող խորհրդանիշ-արժեք է։ Այն մեր ինքնությունը ամեն գնով պաշտպանելու միասնական կամքի արտահայտման օրն է։Առաջին հանրապետության ստեղծումը և գոյությունը անուրանալի դեր ունի մեր ժողովրդի պատմության, ներկայի և ապագայի համար։Մեր շատ իրավունքներ խարսխված են այդ հանրապետության միջազգայնորեն ճանաչված սահմանների վրա։

 

Ազգային-ժողովրդավարական Բևեռը մշտապես հանդես է եկել ներկա Հայաստանի հանրապետության որպես 1918 թ․ մայիսի 28-ին ծնված Հայաստանի հանրապետության իրավահաջորդի գիտակցման անհրաժեշտության պնդումով, որպես այն իրավա-քաղաքական հիմք, որը մեզ հնարավորություն կտա դուրս գալու ապօրինի սահմանազատման ներկա ծուղակից, դատական կարգով լուծելու Հայաստանի սահմանազատման խնդիրները եւ կանխելու Ադրբեջանի կողմից մեզ պարտադրվող ռազմատուգանքների գալիք դատական թելադրանքը և վերջինիս ՝ մեր պետականության ապագայի համար ավերիչ հետեւանքները։

 

Ի տես Հայաստանի անկախության և ինքնիշխանության կորստի գոյութենական սպառնալիքների, որոնք բխում են Ադրբեջանի` Հայաստանի նկատմամբ վարվող ագրեսիվ քաղաքականությանից,

Ի տես մեր երկրի հյուսիսում և հարավում սկիզբ առած աշխարհա-քաղաքական «փոթորիկների» հետևանքով մոտալուտ համակարգային ճգնաժամի,

Ի տես Նիկոլ Փաշինյանի վարած հակասահմանադրական, ապազգային, պարտվողական և հակաժողովրդավարական քաղաքականության, որը հանգեցրել է հասարակության քաղաքական պառակտման եւ կաթվածահարության,

Ազգային-ժողովրդավարական Բևեռը դիմում է հայրենիքի եւ հայրենաբնակ հայության գոյությամբ մտահոգ Հայաստանի եւ սփյուռքի գործիչներին ու շրջանակներին՝ առաջարկելով միանալ հայրենիքում սկսված ազգային-ազատագրական շարժմանը հետեւյալ նպատակներով.