Փաշինյանի վարչախմբի` ս․/թ․ hոկտեմբերին Ռուսաստանի Կազան քաղաքում BRICS-ի գագաթնաժողովին մասնակցելու որոշումը վերջնական հարված է Հայաստանի ինքնիշխանությանը, Ռուսաստանի ամբողջատիրական վերահսկողությունից և Ադրբեջանի ու Թուրքիայի սպառնալիքներից ազատ ապրելու մեր ձգտումներին։
Այս որոշումը որևէ կասկած չի թողնում պուտինյան Ռուսաստանին վարչախմբի անսակարկ հնազանդության վերաբերյալ, ինչի մասին Ազգային-ժողովրդավարական Բևեռը տարիներ շարունակ զգուշացնում էր Հայաստանի քաղաքացիներին և արտերկրի մեր գործընկերներին։
Նույնիսկ Փաշինյանի ջերմեռանդ կողմնակիցներն են գիտակցում նրա ստեղծած իրավիճակի լրջությունը և այն ուղղության վտանգավորությունը, ուր նա շարունակում է տանել հանրապետությունը։
Նրա վեցամյա իշխանությունը մեծ ստերով և խաբեություններով սփռված ճանապարհ է, որը սասանել է Հայաստանի ինքնիշխանությունը, պաշտպանունակությունը և օրենքի գերակայությունը, հանգեցրել է Հայաստանի պատմական Արցախ նահանգի կորստին և Հայաստանը կանգնեցրել է ցեղասպան Ալիևի վարչախմբի և նրա ռուս ու թուրք տերերի կողմից հերթական նվաստացուցիչ պարտության և, ի վերջո, հումանիտար աղետի շեմին:
Փաշինյանի կառավարման յուրաքանչյուր օր նոր վտանգներ է ներկայացնում Հայաստանի գոյությանը և սպառնալիք` տարածաշրջանային հավասարակշռության, խաղաղության և կայունության համար։
Հայաստանի արևմտյան գործընկերներն այլևս չպետք է հանդուրժեն Փաշինյանի վարչախմբի բիրտ իշխանատիրական միտումները, երբ Հայաստանի անվտանգությանն ու ապահովությանն առնչվող բախտորոշ որոշումները կայացվում են հիմնականում չընտրված, թերի կրթված և անփորձ հլուների մի փոքր խմբի կողմից։
Հայաստանի ժողովուրդն արժանի է որոշումների կայացման այնպիսի թափանցիկության, որն արտացոլում է հանրապետության և նրա բնակչության լավագույն շահերը։
Հայաստանն արժանի է լինել իսկական ժողովրդավարական երկիր և լավ կառավարվել։
Վարչախմբի դիմակը վերջապես պատռվել է։ Հայաստանի քաղաքացիների և արտերկրում նրա իսկական ընկերների գործելու ճիշտ ժամանակն է:
Ազգային-ժողովրդավարական Բևեռի խորհուրդ
9 սեպտեմբերի, 2024, Երևան: